19 MART 2015

"Hemofiliyanın diaqnostika və müalicəsi üzrə klinik protokol"un aidiyyəti müəssisələrə paylanılması prosesinə başlanılıb

Səhiyyə Nazirliyinin İctimai Səhiyyə və İslahatlar Mərkəzində (İSİM) hazırlanmış növbəti klinik protokol Səhiyyə Nazirliyi kollegiyasının 19 yanvar 2015-ci il 01 saylı qərarı ilə təsdiq edildi. Qabaqcıl tibb mütəxəssislərinin tərtib etdiyi "Hemofiliyanın diaqnostika və müalicəsi üzrə klinik protokol" hematoloqlar və müxtəlif ixtisaslı həkimlər üçün nəzərdə tutulub. Klinik protokol hemofiliyalı uşaqlar, yeniyetmələr, böyüklərdən ibarət pasiyent qrupunu əhatə edir. Klinik protokol sübutlu təbabətə əsaslanan müasir diaqnostika və müalicə metodlarını tətbiq etməklə hemofiliyanın diaqnostika, müayinə və profilaktikasının təkmilləşdirilməsi, erkən aşkar edilmə səviyyəsinin yüksəldilməsi, xəstələrin həyat keyfiyyətinin və sosial adaptasiyasının yaxşılaşdırılmasına nail olmaq məqsədlərini daşıyır.

"Hemofiliyanın diaqnostika və müalicəsi üzrə klinik protokol"da tibb mütəxəssislərinə hemofiliyanın A və B formaları, hemofiliyaya çox oxşayan Von Willebrand xəstəliyi arasında differensial diaqnostika, xəstəliyin aşkarlanması və müalicəsi ilə bağlı qabaqcıl texnologiyaya əsaslanan üsulların tətbiqi tövsiyə olunur. Bu protokol müəyyən tibbi müdaxilənin effektivliyi ilə bağlı ən etibarlı elmi məlumatlar əsasında tərtib olunub.

İSİM tərəfindən çap edilmiş "Hemofiliyanın diaqnostika və müalicəsi üzrə klinik protokol"un aidiyyəti müəssisələrə paylanılması prosesinə artıq başlanılıb.