20 NOYABR 2015

İSİM-də “Mamalıqda təkmilləşdirilmiş təxirəsalınmaz yardım” üzrə təlimlərə başlanıldı

2015-ci il noyabrın 19-20-də Səhiyyə Nazirliyinin İctimai Səhiyyə və İslahatlar Mərkəzində (İSİM) “Mamalıqda təkmilləşdirilmiş təxirəsalınmaz yardım” (ALSO) üzrə təlim keçirildi. Təlim Amerika Ailə Həkimləri Akademiyasının "Advanced Life Support in Obstetrics" (ALSO) kursunun keçirilməsinə icazə lisenziyası əsasında aparılıb. Elmi-Tədqiqat Mamalıq və Ginekologiya İnstitutu (ETMGİ) ilə birgə keçirilən bu təlimdə Bakı şəhərinin doğuşayardım müəssisələrində çalışan mama-ginekoloqlar və mamalar iştirak etdilər.

Təlim iştirakçıları hamilə qadınlarda baş verə bilən ekstremal vəziyyətlərdə vaxtında və peşəkar tibbi yardımın göstərilməsi istiqamətində bilik və bacarıqlar əldə etdilər. Eləcə də peşəkar tibbi yardımın göstərilməsi üçün səmərəli komanda işinin qurulması qaydalarına yiyələndilər.

“Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramı”nın həyata keçirilməsi üzrə Səhiyyə Nazirliyinin Tədbirlər Planının 3.2-ci bəndinə əsasən keçirilən təlimi ETMGİ-nin əməkdaşları olan sertifikatlaşdırılmış təlimçilər apardı. Təlimlər noyabrın 26-27-də, dekabrın 3-4-də, 10-11-də və 17-18-də növbəti qruplar üçün davam edəcək.