30 YANVAR 2015

Gəncədə “Uşaqların icbari dispanserizasiyası və uşaq xəstəliklərinin erkən aşkarlanması və profilaktikası” mövzusunda təlim keçirildi

Azərbaycan Respublikası Səhiyyə Nazirliyinin əmri ilə təsdiq edilmiş 2013-2017-ci illəri əhatə edən “Uşaqların icbari dispanserizasiyadan keçirilməsinə dair Dövlət Proqramı”nın həyata keçirilməsi üzrə Azərbaycan Respublikası Səhiyyə Nazirliyinin Tədbirlər Planın 4.1-ci bəndinə əsasən Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən icra edilən pilot layihə çərçivəsində növbəti təlim kursu 2015-ci il yanvarın 28-30-da Gəncədə fəaliyyət göstərən 2 Birləşmiş Uşaq Xəstəxanası və 5 uşaq poliklinikasının 26 pediatrı üçün keçirildi. Uşaqların dispanserizasiyasını həyata keçirən ilkin səhiyyə işçiləri üçün xəstəliklərin erkən aşkarlanması və müalicəsi üzrə keyfiyyət standartları və klinik protokollar əsasında keçirilən təlimdə həmçinin Gəncə Şəhər Səhiyyə İdarəsinin nümayəndələri də iştirak etdilər.

İSİM-in nümayəndələri Nabil Seyidov və İradə Cəfərova, Əziz Əliyev adına Azərbaycan Dövlət Həkimləri Təkmilləşdirmə İnstitutunun nümayəndəsi Mətanət Qaraxanova tərəfindən aparılan təlimdə uşaqların icbari dispanserizasiyasının təşkili məsələləri, habelə dispanserizasiya çərçivəsində bir sıra xəstəliklər, bu xəstəliklərin profilaktikası və erkən aşkarlanması, eləcə də diaqnostikası barədə təqdimatlar edildi.

Layihə çərçivəsində növbəti təlim Mingəçevirdə keçiriləcək.