18 İYUN 2010

İctimai səhiyyə sistemində epidemioloji nəzarət mövzusunda seminar

2010-cu il 16-18 iyun tarixlərində İctimai Səhiyyə və İslahatlar Mərkəzində (İSİM) Abt Associates tərəfindən həyata keçirilən USAID-in İlkin Səhiyyə Xidmətlərinin Gücləndirilməsi Layihəsi çərçivəsində “İctimai səhiyyə sistemində epidemioloji nəzarət” mövzusuna həsr edilmiş 3 günlük seminar keçirildi.

İSİM-in heyətinə epidemioloji nəzarət sistemi haqqında ümumi məlumat vermək məqsədilə keçirilən seminarı ABŞ-nın CDC təşkilatının Epidemioloji Araşdırma Xidmətində stajor olan Aybəniz İbrahimova və Abt Associates təşkilatının məsləhətçisi Fuad İbrahimov aparırdı.

Təlimçilər seminarın nəzəri hissəsində ictimai səhiyyədə “epidemioloji nəzarət” (EN) anlayışı, epidemioloji nəzarət sisteminin ictimai səhiyyədə rolu, epidemioloji nəzarət üzrə məlumatların təhlili, sorğu anketinin hazırlanması, EN tədqiqatlarında seçmənin aparılması, fərziyyələrin hazırlanması, travmalar üzrə EN sistemi, ABŞ-da ictimai səhiyyə sahəsində milli məlumatların əsas mənbələri barədə ətraflı məlumat verdilər.

Həmçinin iştirakçılar epidemioloji nəzarət üzrə məlumatların təhlili sahəsində çalışmaları həll etdilər.