ÜST-nin 2001-ci ildə təqdim olunmuş “Dünyada səhiyyənin vəziyyəti haqqında: Psixi Sağlamlıq, Yeni Anlayış, Yeni Ümid” məruzəsində psixi xəstəliklərlə bağlı problemlərin ağırlığının elmi sübutları verilmişdir. Eyni zamanda bu hesabatda ictimaiyyətə arxalanan psixi sağlamlıq sistemi və xidmətinin qurulmasının zəruriliyi qeyd olunmuş və əsaslandırılmışdır. Ölkə və regionlarda psixi sağlamlıq sistemi haqqında əsas məlumatların toplanmasına kömək məqsədi ilə ÜST tərəfindən “Psixi Sağlamlıq Sisteminin Qiymətləndirilməsi” üçün vasitə tərtib olunmuşdur. “Psixi Sağlamlıq Sisteminin Qiymətləndirilməsi” vasitəsi ilə Azərbaycanın psixi sağlamlıq sistemindəki çatışmazlıqların dəqiq və aydın mənzərəsi əldə edilə bilər və bu məlumatlar müəyyən vaxt ərzində psixi sağlamlıq sahəsində və psixiatriya yardımı göstərilməsində yaxşılaşmaya nail olmağa imkan yaradar.

“Psixiatriya yardımı haqqında” Azərbaycan Respublikasının Qanunu ilə yanaşı, “Əhalinin Psixi Sağlamlığı Siyasəti və Kadrların Təkmilləşdirilməsi Strategiyası” əhalinin psixi sağlamlığının möhkəmləndirilməsi, keyfiyyətli psixososial yardımın göstərilməsi, eləcə də psixi pozğunluqlardan əziyyət çəkən şəxslərin hüquq və maraqlarının qorunması sahələrində praktiki fəaliyyəti tənzimləyəcəkdir. Özündə ümumi baxışları, məqsəd və prinsipləri, fəaliyyət istiqamətlərini birləşdirən həmin sənəd, psixiatriya xidmətinin maliyyələşdirilməsi, onun maddi-texniki bazasının gücləndirilməsi, mütəxəssislərin peşəkar hazırlıq səviyyəsinin yüksəldilməsi, həmçinin psixi sağlamlıq sahəsində müalicə-profilaktika tədbirlərinin yaxşılaşdırılması məsələlərinə kompleks yanaşmanın həyata keçirilməsinə imkan yaradacaqdır.

Bu sənədin işlənib hazırlanması üçün yaradılmış işçi qrupların tərkibinə psixiatrlar, dövlət və qeyri-hökumət təşkilatlarının mütəxəssisləri daxil edilmişdir. Layihənin müəyyən mərhələsində işçi qruplar tərəfindən hazırlanmış ilkin variantların təhlil edilib qiymətləndirilməsi, lazımi düzəlişlərin aparılması üçün psixiatriya və psixologiya sahəsində Azərbaycanın məşhur alimləri, tədqiqatçıları və ekspertləri cəlb ediləcəkdir.

“Əhalinin Psixi Sağlamlığı Siyasəti və Kadrların Təkmilləşdirilməsi Strategiyasının” hazırlanmasına ümumi rəhbərliyi İctimai Səhiyyə və İslahatlar Mərkəzinin direktoru Ceyhun Məmmədov həyata keçirir. Layihənin əlaqələndiriciləri: Gəray Gəraybəyli – Azərbaycan Respublikası Səhiyyə Nazirliyinin baş psixiatrı və Psixi Sağlamlıq üzrə Milli Koordinator; Sevil Əsədova – ÜST-nin ölkə ofisinin Psixi Sağlamlıq Proqramının texniki məsləhətçisi.