Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Daxili İşlər Nazirliyinin (DİN) Polis Akademiyasının rəhbərliyi, müəllim-zabit heyəti və kursantlarının iştirakı ilə “Sağlamlıq sahəsində prioritetlər və strategiyalar, sağlamlıq hüquqları və zərərli vərdişlərlə mübarizə” mövzusunda tədbir təşkil olunub. Polis Akademiyasının Şəxsi heyətlə iş üzrə şöbəsinin psixoloqu Azər Hüseynov ölkəmizdə gənclərin sağlam ruhda böyüməsi və hərtərəfli inkişafının dövlət siyasətinin əsas prioritetlərindən biri olduğunu vurğulayıb. Akademiyanın Tibb hissəsinin həkim-terapevti, polis kapitanı Əlisəfa Vəlizadə bildirib ki, gənclərin fiziki və psixoloji sağlamlığının qorunması, keyfiyyətli təhsil alması və mənəvi tərbiyəsinin düzgün istiqamətdə formalaşdırılması gələcəyin savadlı və peşəkar kadrlarının yetişdirilməsi baxımından mühüm əhəmiyyət daşıyır. Tədbirdə İSİM-in İctimai sağlamlıq şöbəsinin müdiri Tofiq Musayev və baş hüquq məsləhətçisi Rüstəm Məmmədov geniş təqdimatla çıxış ediblər. Çıxışlarda ənənəvi risk faktorları ilə yanaşı, müasir dövrdə sağlamlığa ciddi təsir göstərən digər təhlükələrin də nəzərdən keçirilməsinin xüsusi əhəmiyyət kəsb etdiyi bildirilib. Mövzu ətrafında fikir mübadiləsi aparılıb və beynəlxalq təcrübə müzakirə edilib. Yekunda iştirakçıları maraqlandıran suallar cavablandırılıb və onlara İSİM tərəfindən hazırlanan maarifləndirici materiallar təqdim olunub.