Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən Kürdəxanı Sağlamlıq Mərkəzində 24-30 aprel Ümumdünya İmmunlaşdırma Həftəsi çərçivəsində tibb işçiləri və valideynlər üçün maarifləndirici tədbirlər təşkil olunub. Ümumdünya Səhiyyə Təşkilatının Azərbaycan Ofisi ilə əməkdaşlıqla keçirilən tədbirlərdə immunlaşdırmanın əhəmiyyətli rolu diqqətə çatdırılıb. İSİM-in direktoru Səbinə Babazadə çıxış edərək, ölkəmizdə uşaqların yoluxucu xəstəliklərdən qorunması üçün dövlət tərəfindən bütün lazımi profilaktik tədbirlərin görüldüyünü və peyvəndlərin keyfiyyətli şəkildə təmin edildiyini vurğulayıb. O, valideynləri övladlarının sağlam gələcəyi naminə onları peyvənd təqviminə uyğun olaraq vaxtında həkim müayinəsindən keçirməyə və peyvəndlənmə prosesində aktiv iştirak etməyə çağırıb. Kürdaxanı Sağlamlıq Mərkəzinin baş həkimi Əhmədova, İSİM-in Monitorinq və təhlil şöbəsinin müdiri İnara Makayeva, müdir müavini Zümrüd Kazımova çıxış edərək, peyvəndin immuniteti necə gücləndirdiyi, xəstəliklərin qarşısının alınmasındakı rolu və qeyd olunan sahədəki yeniliklər barədə ətraflı məlumat veriblər. Peyvənd otağında valideynlərə nümunəvi davranışları üçün, övladlarının sağlamlığını vaxtlı-vaxtında peyvəndlərlə möhkəmləndirdiyinə görə sertifikatlar təqdim olunub. Peyvənd olunan uşaqlara İSİM tərəfindən rəmzi hədiyyələr və geniş çeşiddə maarifləndirmə materialları paylanılıb.