Səhiyyə Nazirliyi İctimai Səhiyyə və İslahatlat Mərkəzi (İSİM) tərəfindən Bakı şəhəri üzrə 139, 252, 276, 316 və 334 nömrəli orta  məktəblərdə şagirdlər üçün “Rəqəmsal savadlılıq” mövzusunda  maarifləndirici görüşlər keçirilib. İSİM-in Layihələrin əlaqələndirilməsi şöbəsinin əməkdaşı Elnarə Nuriyeva iştirakçılara rəqəmsal savadlılıq barədə ətraflı məlumat verib. Bildirib ki, rəqəmsal savadlılıq müasir dövrdə yalnız kompüterdən istifadə etmək bacarığı deyil, həm də rəqəmsal texnologiyalar vasitəsilə məlumatı tapmaq, qiymətləndirmək və təhlükəsiz şəkildə paylaşmaq qabiliyyətidir. Bu gün internetdə hər saniyə nəhəng həcmdə məlumat paylaşıldığı diqqətə çatdırılıb və xəbəri etibarlı mənbədən əldə etməyin vacibliyi, yalan xəbərləri ayırd etmək, texnologiyalardan təhlükəsiz istifadə qaydaları məktəblilərə izah olunub. Müasir dövrdə rəqəmsal savadlılığın əhəmiyyəti, xüsusilə dövlət xidmətlərinin rəqəmsallaşdığı bir vaxtda müxtəlif xidmətlərdən (məsələn, onlayn növbə götürmə və ya analiz nəticələrinə baxma) rahat faydalanmaq üçün bu bacarıqların vacibliyi vurğulanıb. İştirakçılara İSİM tərəfindən hazırlanmış maarifləndirici çap materialları təqdim olunub, onları maraqlandıran suallar cavablandırılıb.