8 DEKABR 2025
Səhiyyə Nazirliyi Qarabağ Universitetində tələbələr üçün interaktiv tədbir təşkil edib
Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Qarabağ Universitetinin Tibb və sağlamlıq elmləri fakültəsində “Antibiotiklərdən sui-istifadəyə yox deyək!” mövzusunda interaktiv tədbir keçirilib. Ümumdünya Səhiyyə Təşkilatının (ÜST) Azərbaycan nümayəndəliyi ilə əməkdaşlıqla təşkil edilən tədbirin məqsədi antibiotiklərin düzgün istifadəsinə dair fikir mübadiləsi aparmaq, gənc nəsli bu mövzuda maarifləndirmək olub.
Tədbirdə universitetin müəllim və tələbələri, səhiyyə işçiləri və ÜST-nin nümayəndələri iştirak ediblər.
İSİM-in direktoru Səbinə Babazadə müasir təhsil modeli ilə seçilən Qarabağ Universitetinin tibbi təhsil alan tələbələrinə uğurlar arzulayıb. O, müasir tibb elminin vacib sahəsinə çevrilən ictimai səhiyyənin aktual istiqamətlərindən, ölkəmizdə sağlamlığın qorunması məqsədilə həyata keçirilən məqsədyönlü tədbirlərdən söz açıb.
ÜST-nin Azərbaycan nümayəndəliyinin mütəxəssisi Cəvahir Süleymanova, İSİM-in Monitorinq və təhlil şöbəsinin müdiri İnara Makayeva, Səhiyyə kommunikasiyası şöbəsinin müdiri Laura Quliyeva və Təlim-resurs şöbəsinin müdir müavini Pərvin Quliyevanın çıxışlarında antibiotiklərdən düzgün istifadənin təşviqi ilə bağlı ətraflı məlumat verilib.
Bildirilib ki, hər il Ümumdünya Antibiotikdən Düzgün İstifadə Həftəsi çərçivəsində keçirilən tədbirlərin, bu istiqamətdə aparılan maarifləndirilmənin məqsədi antibiotiklərdən lüzumsuz istifadənin qarşısını almaq və onların qəbulunun yalnız ixtisaslaşmış səhiyyə mütəxəssisi tərəfindən təyin edilməsinə nail olmaqdır.
Tədbir interaktiv oyunla davam edib. Tələbələr antibiotiklərlə bağlı sualları cavablandırıb, təkliflərini bildirib, maarifləndirmənin əhəmiyyətini vurğulayıblar. İştirakçılara xatirə hədiyyələri və geniş çeşiddə maarifləndirici materiallar təqdim edilib.
Yekunda qonaqlar universitetlə, dərs otaqları ilə tanış olublar.