30 MAY 2025
Ümumdünya Tütünsüz Gününə həsr edilmiş regional tədbirlər keçirilib
Səhiyyə Nazirliyi İctimai Səhiyyə və İslahatlar Mərkəzi (İSİM) və Lənkəran Masallı, Xaçmaz və Quba rayonlarının İcra Hakimiyyətlərinin birgə təşkilatçılığı ilə regional tədbirlər keçirilib. Lənkəran şəhəri 1 nömrəli tam orta məktəbində, Masallı şəhərinin Gənclər Evində, Xaçmaz şəhərinin peşə liseyində, Quba şəhərində Azərbaycan Dövlət Pedaqoji Universitetinin Quba filialında təşkil olunan tədbirlər 31 may - Ümumdünya Tütünsüz Gününə və Tütünә qarşı mübarizә haqqında ÜST-nin Çәrçivә Konvensiyasının qüvvəyə minməsinin 20-ci il dönümünə həsr edilib.
Tədbirlərdə İSİM-in ictimai sağlamlıq şöbəsinin müdiri Tofiq Musayev və baş hüquqşünası Rüstəm Məmmədov, Lənkəran, Masallı, Xaçmaz və Quba rayonlarının İcra Hakimiyyətlərinin rəhbər şəxsləri, eləcə də aidiyyəti regional qurumların nümayəndələri iştirak ediblər.
Tədbirlərdə nümayiş etdirilən təqdimatlar və geniş müzakirələr zamanı tütün epidemiyası və onun yaratdığı qarşısı alına bilən xəstəliklər və ölüm hallarına xüsusi diqqət yetirilib. Diqqətə çatdırılıb ki, hər il 31 may tarixində qeyd olunan Ümumdünya Tütünsüz Gününə həsr edilən tədbirlərin məqsədi tütündən istifadənin təhlükələri barədə məlumatlılığı artırmaqdır. Tədbir iştirakçıları ilə fikir mübadiləsi aparılıb, onlara maarifləndirici materiallar paylanılıb.