11 SENTYABR 2024
“Uşaqların ətraf mühitlə bağlı sağlamlığı” mövzusunda təlimlərə başlanıb
Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən BMT-nin Uşaq Fondunun (UNİCEF) dəstəyi ilə “Uşaqların ətraf mühitlə bağlı sağlamlığı” mövzusunda təlimlərə başlanıb. Təlimlərin əsas məqsədi tibb işçilərinin bilik və bacarıqlarının inkişaf etdirilməsi, o cümlədən iqlim dəyişikliyi, ətraf mühitin çirklənməsi ilə bağlı məlumatlılığın artırılması olub. Təlimlərdə ginekoloq, pediatr,mama və tibb bacısı olmaqla, ümumilikdə 124 tibb işçisinin iştirakı, sonda iştirakçılara sertifikatların təqdim olunması nəzərdə tutulub.
10 sentyabr - 3 oktyabr 2024-cü il tarixlərində keçiriləcək təlimlərdə qlobal iqlim dəyişikliyi barədə, ətraf mühit amillərinin, ev təsərrüfatı və açıq havanın çirklənməsinin uşaqlara və hamilə qadınlarla təsiri ilə bağlı geniş məlumat veriləcək.
Qeyd edək ki, İSİM və BMT-nin Uşaq Fondu (UNİCEF) tərəfindən birgə əməkdaşlıqla, uşaqların ətraf mühitlə bağlı sağlamlığı üzrə tibb işçiləri və əhali arasında məlumatlılığın artırılması istiqamətində müxtəlif tədbirlərin həyata keçirilməsi, faydalı tövsiyələrin verilməsi, maarifləndirici kitabçaların çap olunaraq paylanılması nəzərdə tutulub.