4 İYUN 2024
İSİM-in nümayəndələri “Mama-ginekologiya, reproduktiv sağlamlıq və qadın sağlamlığı” üzrə beynəlxalq konfransda çıxış ediblər
Səhiyyə Nazirliyinin Elmi Tədqiqat Mama-Ginekologiya İnstitutu, İctimai Səhiyyə və İslahatlar Mərkəzi (İSİM), Ginekologiya, Perinatologiyanın İnkişafına Dəstək İctimai Birliyinin birgə təşkilatçılığı və Uptodate in Medicine-nin texniki dəstəyi ilə 4 iyun 2024-cü ildə Bakı şəhərində “Mama-ginekologiya, reproduktiv sağlamlıq və qadın sağlamlığı” üzrə II Bakı beynəlxalq konfransı keçirilib.
İSİM-in direktoru Qəhrəman Haqverdiyev konfransın açılışında çıxış edib. O, reproduktiv sağlamlığın qorunması istiqamətində səhiyyə işçiləri və ictimai səhiyyə mütəxəssisləri tərəfindən aparılan maarifləndirilmədə müasir innovativ yanaşmaların rolunu vurğulayıb, bu məqsədlə hazırlanan “Burla Xatun” və “Video Doktor” mobil tətbiqləri barədə ətraflı məlumat verib.
İSİM-in Tibbi keyfiyyət standartları şöbəsinin müdiri Billurə Yusifova “Yeni doğulanlarda skrininq və genetik testlərin mövcud durumu, gələcək perspektivlər” mövzusunda geniş təqdimatla çıxış edərək iştirakçıları maraqlandıran sualları cavablandırıb.
Konfransda müasir ginekologiyada yeni müalicə üsullarının tətbiqi, ana ölümlərinin qarşısının alınması, doğum zamanı tibbi müdaxilələrin idarə edilməsi və digər aktual mövzularda məruzələr dinlənilib və müzakirələr aparılıb.