4 OKTYABR 2019

İSİM-in nümayəndəsi Almatı şəhərində hepatit virusu mövzusuna həsr olunmuş işçi qrup iclasında iştrak etdi

1-2 oktyabr 2019-cu il tarixdə Qazaxıstan Respublikasının Almatı şəhərində “Orta Asiya və Cənubi Qafqaz ölkələrində hepatit viruslarının eliminasiyası və ilkin tibbi-sanitar yardımın rolu” mövuzunda regional işçi qrupun iclası keçirildi.

Ümumdünya Səhiyyə Təkilatının (ÜST) Avropa üzrə Regional Ofisi və Qazaxıstan Respublikasının Səhiyyə Nazirliyinin birgə təşkilatçılığı ilə keçirilən iclasın əsas məqsədi hepatit virusunun dünya ölkələri üzrə qlobal yükünü azaltmaq, hepatit viruslu xəstələrin göstərilən xidmətə əlçatanlığını asanlaşdırmaq üçün yolları müzakirə etmək, milli səviyyədə hepatit B və C viruslarının monitorinqini və qiymətləndirilməsini həyata keçirmək idi.

Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzinin (İSİM) Monitorinq və təhlil şöbəsinin müdir müavini İnara Makayeva iclasda iştirak etdi.

İki gün davam edən iclasda mütəxəssislər hepatit xəstəliyinin qarşısının alınması istiqamətində cavab tədbirlərinin görülməsini, qəbul olunan proqramların həyata keçirilməsi ilə bağlı ölkələrdə mövcud inkişafın izlənilməsi işini, xəstələrə göstərilən tibbi xidmətlərin yeni modellərini geniş müzakirə etdilər. Qrup iclasında Azərbaycan, Tacikistan, Özbəkistan, Qırğızıstan, Türkmənistan ölkələrinin milli planlarının panel müzakirələri də həyata keçirildi. Narkotik aludəçiləri və həbsxanalarda olan viruslu hepatit xəstələrinin müalicə işinin aparılması işi diqqətə çatdırıldı.

İclasın yekun günündə ölkə iştarkçıları 7 qrupa bölündülər və hepatit B və C xəstəliyi üzrə cavab tədbirlərinin koordinasiyasını, yol xəritəsinin təşkili ilə bağlı tapşırıqları yerinə yetirdilər və sonda nəticələrin hesabatını apardılar.

Şəkillərlə burada tanış olmaq olar.