8 İYUN 2019
Quba və Lənkəranda həkimlər üçün təlim keçirildi
Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi, Respublika Endokrinologiya Mərkəzinin təşkilatçılığı ilə 2019-cu il mayın 11-də və iyunun 8-də Quba və Lənkəran rayonlarının mərkəzi xəstəxanalarında “Diabetin menecmenti üzrə təkmil təlim” kursu keçirildi.
Kursu giriş sözü ilə Respublika Endokrinologiya Mərkəzinin direktor müavini Babək Salek açaraq bildirdi ki, təlimlərin təşkilində əsas məqsəd həkimləri tibbi yeniliklərlə tanış etməkdir: “Şəkərli diabet xəstəsi mütəmadi olaraq həkim nəzarətində olarsa, həkim məsləhətlərinə əməl edərək şəkərini norma səviyyəsində saxlayarsa, xəstəlikdən yaranan fəsadlardan özünü qorumuş olar. Bunun üçün həkimlər xəstənin həyat keyfiyyətinin artırılması məqsədilə müalicə və profilaktika işi ilə bərabər, həm də maarifləndirici tədbirlər həyata keçirməlidirlər”. Təlim zamanı Babək Salek şəkərli diabetlə yaşamağın yolları, müasir müalicə mexanizimləri, sosial və psixoloji aspeklər, diabetik pəncə, retinopatiya və digər mövzularla bağlı ən son məlumatları iştirakçıların diqqətinə çatdırdı. Respublika Endokrinologiya Mərkəzinin Tibb üzrə fəlsəfə doktoru Nərminə Hüseynova şəkərli diabetin təsnifatı, müasir diaqnostikası, şəkərli diabet zamanı yaranan xroniki venoz çatışmazlığı, diabet və hamiləlik mövzuları üzrə çıxış etdi.
Kursu müvəffəqiyyətlə başa vuran həkimlərə 14 kredit balı ilə qiymətləndirilən sertifikatlar təqdim olundu.