• Sübutlara əsaslanan tibbi təlimatlar Azərbaycan dilinə tərcümə olunacaq
  • Davamlı Tibbi Təhsilin tətbiqi ilə bağlı maarifləndirici toplantı keçirildi
  • Körpələri ana südü ilə qidalandırmanın təbliğinə həsr olunmuş dəyirmi masa keçirildi
  • Azərbaycanda 1-7 oktyabr “Ana südü ilə qidalandırma” həftəsinin başlaması ilə bağlı brifinq keçirildi
  • “Ümumdünya ana südü ilə qidalandırma həftəsi” qeyd olundu
  • İSİM-in nümayəndəsi Aşqabadda keçirilən elmi-praktik konfransda iştirak etdi
  • İSİM-də “Kliniki Qərara Dəstək Təlim Təşəbbüsü” layihəsinin nailiyyətlərinə həsr olunmuş konfrans təşkil olundu
  • İSİM işə qəbul elan edir. Vakansiyalarla burada tanış ola bilərsiniz!

XƏBƏRLƏR bütün xəbərlər

20 SENTYABR 2018

Goranboyda fövqəladə hallarda zərərçəkmiş əhalinin reproduktiv sağlamlığının qorunması mövzusunda təlim keçirildi

Təbii fəlakətlərə hazırlıq, onun nəticələrinin yüngülləşdirilməsi və fəlakətlərdən sonra tələb olunan bərpa işlərinin idarə olunması ictimai səhiyyəni narahat edən aktual məsələlərdən biridir. Fövqəladə hallarda insanların xilas edilməsində xidmət göstərənlərin bilik və təcrübələrini təkmilləşdirmək məqsədi ilə 2012-ci ildən etibarən,  BMT-nin Əhali Fondunun texniki dəstəyi, Səhiyyə Nazirliyinin İctimai Səhiyyə və İslahatlar Mərkəzi (İSİM), Elmi-Tədqiqat Mamalıq və Ginekologiya İnstitutunun birgə əməkdaşlığı ilə “Humanitar sahələrdə Reproduktiv Sağlamlıq üzrə Minimal İlkin Xidmətlər Paketinin (MİXP) əlaqələndirilməsi və həyata keçirilməsi üçün milli potensialın artırılması” layihəsi uğurla həyata keçirilməkdədir. Fövqəladə hallarda zərər çəkmiş əhali arasında xəstələnmə, əlillik, ölüm hallarının azaldılması istiqamətində həyata keçirilən layihənin 5 əsas məqsədi sırasında cinsi zorakılığın qarşısının alınması və zərər çəkənlərə yardımın göstərilməsi, İİV-in ötürülməsinin azaldılması, ana və yeni doğulmuş uşaqlar arasında həddən artıq xəstələnmə və ölüm hallarının qarşısının alınması kimi məsələlər yer alır.

Səhiyyə Nazirliyi və BMT-nin Əhali Fondunun dəstəyi ilə həyata keçirilən bu layihə çərçivəsində, DİN-in şəxsi heyəti və müdavimləri üçün Polis Akademiyasında fövqəladə hallara hazırlıqla bağlı təkmilləşdirmə təlimləri aparılıb, eyni zamanda regionlarda tibb işçilərinin fövqəladə hallar zamanı fəaliyyətinin daha da stimullaşdırılması üçün praktik məşğələlər təşkil olunub. İndiyədək həyata keçirilən bu təlimlərdə   Sabirabad, Saatlı, İmişli, Füzuli, Ağcabədi, Beyləqan, Şamaxı, İsmayıllı, Qəbələ, Qobustan, Ağsu, Oğuz, Qax, Zaqatala, Balakən, Gəncə, Göygöl, Daşkəsən, Samux, Quba, Xaçmaz, Qusar, Siyəzən və Şabran rayonlarından olan baş həkimlər, baş həkim müavinləri, mülki müdafiə üzrə qərargah rəisləri və xəstəxanaların ginekologiya şöbələrinin müdirləri, habelə Fövqəladə Hallar Nazirliyinin və Daxili İşlər Nazirliyinin tibb idarələrinin nümayəndələri iştirak ediblər.  

19-20 sentyabr 2018-ci ildə analoji təlimlər Goranboy Mərkəzi Xəstəxanasında keçirildi.  Təlimlər İSİM-in Layihələrin əlaqələndirilməsi şöbəsinin müdiri Səbinə Babazadə, 5 nömrəli qadın məsləhətxanasının müdiri Leyla Məmmədova, eləcə də Elmi-Tədqiqat Mamalıq və Ginekologiya İnstitutunun Poliklinika şöbəsinin müdiri Gülnarə Rzayeva tərəfindən aparıldı. Goranboy, Tərtər, Ağdam və Bərdə Mərkəzi Rayon Xəstəxanalarının tabeliyində olan tibb müəssisələrinin müalicə işi üzrə müavinləri, mama-ginekoloqlar, o cümlədən təcili və təxirəsalınmaz tibbi stansiyalarının baş həkimləri təlimlərdə iştirak etdilər.

Təlimin ilk günündə tibb işçilərinin fövqəladə hallara hazırlığının yoxlanılması məqsədilə   simulyasiya keçirildi və “zərərçəkmiş” hamilə qadınlara ilkin yardım olundu. Təlimin ikinci günündə isə, göstərilən tibbi yardımlar müzakirə olundu və tibb işçilərinə müvafiq metodiki tövsiyələr verildi.

Qeyd edək ki, BMT-nin Azərbaycandakı Nümayəndəliyinin Rezident Əlaqələndiricisi cənab Qulam İsakzai də təlimlərdə iştirak etdi.