11 İYUN 2015

İSİM-in mütəxəssisləri Türkiyədə "OneHealth Tool" adlı seminarda iştirak etdilər

2015-ci il iyunun 9-11-də Türkiyənin Antalya şəhərində "OneHealth Tool" adlı seminar keçirildi. Birləşmiş Millətlər Təşkilatının Əhali Fondu tərəfindən təşkil olunan seminarda Albaniya, Azərbaycan, Bosniya və Hersoqovina, Gürcüstan, Qazaxıstan, Kosovo, Makedoniya, Serbiya, Ukrayna, Macarıstandan olan səhiyyə nazirliklərinin və müvafiq dövlət qurumlarının nümayəndələri iştirak etdilər. Seminarda Azərbaycanı Səhiyyə Nazirliyinin İctimai Səhiyyə və İslahatlar Mərkəzinin (İSİM) mütəxəssisləri Töhfə Cəmilova və Teymur Hüseynov təmsil etdilər.

Seminarda Şərqi Avropa və Mərkəzi Asiya ölkələrinin nümayəndələri "OneHealth Tool" proqram təminatı ilə tanış olaraq bu alətdən istifadə qaydalarını öyrəndilər.

"OneHealth Tool" proqramı səhiyyə sektorunun istənilən sahəsi, xüsusilə reproduktiv sağlamlıq və ailə planlaşdırılması sahəsində proqramların planlaşdırılması, vəsaitlərin hesablanması, xərcləri və əldə edilən faydaları (o cümlədən planlaşdırılan proqram vasitəsilə xilas edilə bilən insan həyatları, ömür illəri, aradan qaldırılmış iqtisadi və maliyyə itkiləri) hesablamağa və proqnozlaşdırmağa imkan yaradır.