17 MART 2015

Ümumdünya Səhiyyə Təşkilatının 7 aprel 2015-ci ilinin Ümumdünya Sağlamlıq Gününə həsr edilmiş “Təhlükəsiz qidalanmanın 5 açarı” adlı videoçarxı İctimai Səhiyyə və İslahatlar Mərkəzi tərəfindən azərbaycan dilində hazırlandı (VIDEO)

Hər il aprel ayının 7-si Ümumdünya Səhiyyə Təşkilatı (ÜST) tərəfindən Ümumdünya Sağlamlıq Günü kimi qeyd edilir. Həmin gün dünya ictimaiyyətinin diqqətini qlobal miqyasda sağlamlığa aid vacib əhəmiyyət kəsb edən bir mövzuya yönəltmək üçün bir imkandır. Bu ilin mövzusu qida və ərzaq məhsullarının təhlükəsizliyi ilə əlaqəlidir.

ÜST-nin məlumatlarına görə hər gün minlərlə insan qarşısı alına bilinən qida mənşəli xəstəliklərdən dünyasını dəyişir. Qida məhsullarından düzgün istifadə qida mənşəli xəstəliklərin profilaktikasının əsas elementidir. Qida məhsulları hazırlanma prosesinin istənilən mərhələsində təhlükəli mikroorqanizmlərlə çirklənə bilər. Bir çox qida mənşəli xəstəliklərin qarşısını sadə gigiyena qaydalarına riayət etməklə almaq olar. ÜST qlobal sağlamlıq mesajlarının yerli şəraitə uyğunlaşdırılması sahəsində fəal iş aparır və bu işi dəstəkləyir.

Bununla əlaqədar ÜST-nin 7 aprel 2015-ci ilinin Ümumdünya Sağlamlıq Gününə həsr edilmiş “Təhlükəsiz qidalanmanın 5 açarı” adlı videoçarxı Səhiyyə Nazirliyinin İctimai Səhiyyə və İslahatlar Mərkəzi tərəfindən azərbaycan dilinə tərcümə olundu.