3 NOYABR 2009

"Qeyri-infeksion xəstəliklərə dair vəziyyətin təhlili" SEMİNAR

3-4 noyabr 2009-cu il tarixlərində Səhiyyə Nazirliyinin İctimai Səhiyyə və İslahatlar Mərkəzində (İSİM) “Qeyri-infeksion xəstəliklərə dair vəziyyətin təhlili”nə həsr edilmiş seminar keçirildi. Tədbirdə Səhiyyə Nazirliyinin, dövlət, beynəlxalq və qeyri-hökumət təşkilatlarının səhiyyə üzrə mütəxəssisləri və nümayəndələri, ÜST-nin beynəlxalq ekspertləri iştirak etdilər. Seminarda Ümumdünya Səhiyyə Təşkilatının (ÜST) Azərbaycan üzrə ölkə ofisinin İctimai Səhiyyə və İslahatlar Mərkəzi ilə birgə keçirdiyi “Azərbaycanda qeyri-infeksion xəstəliklərlə dair vəziyyətin təhlili” layihəsinin yekun nəticələri açıqlandı, bu sahədə aparıcı mütəxəssislərin çıxışları dinlənildi və irəli gələn məsələlər ətrafında müzakirələr aparıldı.

Seminarda xüsusi vurğulandı ki, qeyri-infeksion xəstəliklərin səbəbləri və onlarla effektli mübarizə üsulları barədə məlumatların kifayət qədər olmasına baxmayaraq, bu biliklərin təcrübədə istifadə olunması və cəmiyyətin bütün təbəqələrinin həyata keçirilən tədbirlərdən faydalanması üçün hələ bir çox işlər görülməlidir. Tədbirin sonunda seminar iştirakçıları ÜST-nin ekspertlərinin rəyini nəzərə alaraq ölkədə qeyri-infeksion xəstəliklərə qarşı milli proqramın tərtib etdirilməsinin zəruriliyini qeyd etdilər və bununla bağlı öz təkliflərini bildirdilər.