11 FEVRAL 2010

İSİM-də növbəti təşkilatlararası iclas keçirilmişdir

İctimai Səhiyyə və İslahatlar Mərkəzinin (İSİM) beynəlxalq təşkilatların nümayəndələri və Səhiyyə Nazirliyinin milli koordinatorların iştirakı ilə növbəti təşkilatlararası iclası fevral ayının 10-da keçirildi.

Gündəliyə uyğun olaraq iclas qısa aylıq hesabatlardan və təqdimatdan ibarət idi. İlk növbədə iştirakçılar yanvar ayı ərzində gördükləri işlər və fəaliyyət planlarında bu il üçün nəzərdə tutulmuş yeni layihələr haqqında məlumat verdilər.

İclas “Səhiyyənin İnkişafına Dəstək” İctimai Birliyinin direktoru Mətləb Verdiyevin təşkilatın fəaliyyəti haqqında təqdimatı ilə davam etdi. Təqdimat zamanı Mətləb Verdiyev təşkilatın yaranma tarixi, devizi, həyata keçirdiyi layihələrlə bərabər hal-hazırda davam etməkdə olan layihələr haqqında ümumi məlumat verdi. O, həmçinin təşkilatın Azərbaycan hökuməti və beynəlxalq təşkilatların dəstəyi ilə səhiyyəyə dayaq durmaq, kömək etmək və əhalinin sağlamlıq durumunu yüksəltmək kimi məqsədlərindən danışdı. Mətləb Verdiyev iştirakçıları “Səhiyyənin İnkişafına Dəstək” İctimai Birliyinin tərəfdaşlıq etdiyi nazirlik, səfirlik, şirkət və QHT-lər haqqında məlumatlandırdı və eləcə də İSİM ilə sıx əməkdaşlığı xüsusilə vurğuladı.Sonda o, təşkilatın gələcək planlarını iştirakçıların nəzərinə çatdırdı və onları maraqlandıran sualları cavablandırdı.

İclasın sonunda İSİM-in rəhbərliyi iclas iştirakçıları üçün maraqlı olan sualları cavablandırdı və növbəti iclasın mart ayının 10-da keçiriləcəyini elan etdi.