13 İYUN 2008

Növbəti Təşkilatlararası iclas Səhiyyə Nazirliyinin İctimai Səhiyyə və İslahatlar Mərkəzində (İSİM) keçirildi.

İclasda səhiyyədə fəaliyyət göstərən beynəlxalq təşkilatların nümayəndələri, Səhiyyə Nazirliyinin Milli Koordinatorları və İSİM-in rəhbərliyi ilə bərabər qonaq qismində Sağlamlığa Çağırış QHT Alyansın koordinatoru Aytəkin Əsgərova və səhiyyə məsələləri üzrə ekspert Süleyman Cəbrayılov iştirak etmişdilər. İclasın gündəliyinə uyğun olaraq görüşün əvvəlində müxtəlif təşkilatların nümayəndələri və Milli Koordinatorlar may ayı ərzində gördükləri fəaliyyətlər barədə məlumat verdilər.

İclas zamanı bir sıra təqdimatlar oldu. Bu təqdimatlar sırasına daxil olan Save the Children təşkilatının “Azərbaycanda Keys Menecment” və Sağlamlığa Çağırış QHT Alyansının öz fəaliyyətləri haqqında təqdimatları iştirakçıların xüsusi marağına səbəb oldu. İclasda İSİM rəhbərliyi QHT-lər tərəfindən təşkilatlararası iclaslarda iştirak etmək barədə çoxsaylı xahişlərini nəzərə alaraq hər ay bir yerli QHT-yə iclasda iştirak etmək və təşkilatları haqqında məlumat verməyə şərait yaradacağını bildirdi.

Müəyyənləşdirildiyi kimi təşkilatlararası iclaslar hər ayın ikinci çərşənbə günü saat 15.00-da İSİM-də keçirilir. Beləliklə, növbəti iclas İSİM-də 9 iyul saat 15:00-da keçiriləcəkdir.