Azərbaycan Qızıl Aypara Cəmiyyətinin təşkilatçılığı ilə 14 iyul 2026-cı ildə “LİBRAFF” kitab mağazasında “Nəsillərarası dialoq: stereotipləri qırırıq, ünsiyyət körpüləri qururuq” mövzusunda tədbir təşkil olunub. Səhiyyə Nazirliyinin İctimai Səhiyyə və İslahatlar Mərkəzi (İSİM), “Güvən” Dayə Xidməti, Azərbaycan Universiteti, 2 saylı Baza Tibb Kolleci, “LİBRAFF” mağazalar şəbəkəsi, Qadın İnkişaf Mərkəzi, “İRƏLİ” İctimai Birliyi və “Sağlamlığa Xidmət” İctimai Birliyinin birgə əməkdaşlığı ilə keçirilən tədbirin əsas məqsədi fərqli nəsillərin nümayəndələri arasında stereotipləri qırmaq, gənclərlə yaşlılar arasında xoş, səmimi və rahat ünsiyyət mühiti yaratmaq olub. Azərbaycan Qızıl Aypara Cəmiyyətinin Sağlamlıq və qayğı şöbəsinin mütəxəssisi Mətanət Qaraxanovanın moderatorluğu ilə keçirilən görüşdə 15 ahıl və 15 gənc olmaqla, ümumilikdə 30 iştirakçı bir araya gəlib. Tədbir çərçivəsində fərqli yaş qruplarından olan iştirakçıların öz həyat təcrübələrini və dünyagörüşlərini sərbəst şəkildə bölüşməsinə, eləcə də bir-birləri haqqında yeni məlumatlar əldə etməsinə şərait yaradılıb. İSİM-in Layihələrin əlaqələndirilməsi şöbəsinin müdiri Leyla Cəfərli, Təlim-resurs şöbəsinin müdiri Kamilla Kərimova, şöbə müdirinin müavini Pərvin Quliyeva, həmçinin əməkdaşlar Elnarə Nuriyeva və Elnarə İsmayılova tədbirdə iştirak ediblər. Leyla Cəfərli çıxış edərək bildirib ki, yaşlı insanların həyat keyfiyyətini yüksəltmək üçün İSİM-in təşəbbüsü ilə həyata keçirilən “Sağlam yaşlanma” layihəsi çərçivəsində iki dəyirmi masa təşkil olunub, bu sahədə məlumatlılığın artırılması məqsədilə müxtəlif tədbirlərin təşkili nəzərdə tutulub. Mövzu ətrafında səmərəli fikir mübadiləsi aparılıb, nəsillərarası əlaqələrin möhkəmləndirilməsi və sosial birliyin gücləndirilməsi istiqamətində belə görüşlərin əhəmiyyəti vurğulanıb.