Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən Ədliyyə Nazirliyinin Akademiyasının şəxsi heyəti üçün qeyri-infeksion xəstəliklərin profilaktikası mövzusunda maarifləndirici tədbir təşkil olunub. İştirakçılara tütünçəkmə, narkomaniya, alkoqolizm və digər zərərli vərdişlərin sağlamlığa, eləcə də cəmiyyətin inkişafına mənfi təsirləri barədə ətraflı məlumat verilib. Ədliyyə Akademiyasının baş məsləhətçisi, 2-ci dərəcəli ədliyyə qulluqçusu Sona Əzizova sağlam həyat tərzinin təşviq olunmasının vacibliyindən söz açıb və gənc nəslin sağlam inkişafında maarifləndirmə tədbirlərinin əhəmiyyətini vurğulayıb. İSİM-in İctimai sağlamlıq şöbəsinin müdiri Tofiq Musayev və baş hüquq məsləhətçisi Rüstəm Məmmədov geniş təqdimatla çıxış ediblər. Çıxışlarda ənənəvi risk faktorları ilə yanaşı, müasir dövrdə sağlamlığa ciddi təsir göstərən digər təhlükələr barədə məlumat verilib, sağlamlığın qorunması istiqamətində ölkəmizdə görülən işlər diqqətə çatdırılıb. Zərərli vərdişlərlə mübarizədə beynəlxalq təcrübə ilə bağlı fikir mübadiləsi aparılıb, təkliflər dinlənilib. Yekunda iştirakçıları maraqlandıran suallar cavablandırılıb və onlara İSİM tərəfindən hazırlanan maarifləndirici materiallar təqdim olunub.