8 APREL 2026
7 aprel - Ümumdünya Sağlamlıq Gününə həsr edilmiş tədbir keçirilib
Səhiyyə Nazirliyi İctimai Səhiyyə və İslahatlar Mərkəzi (İSİM) və Misir Ərəb Respublikasının Azərbaycandakı Səfirliyinin əməkdaşlığı ilə Ümumdünya Sağlamlıq Gününə həsr olunmuş “Sağlamlıq: elmin gücü, mədəniyyətin ruhu” adlı festival keçirilib.
Tədbir Misir Ərəb Respublikasının Azərbaycandakı Səfirliyinin Mədəniyyət və Təhsil Əlaqələri Mərkəzində təşkil olunub. Mərkəzin müdiri, professor Tarek M. Aboul-Fotouh və İSİM-in direktor müavini Qəhrəman Haqverdiyev çıxış edərək, sağlam həyat tərzinin təbliğində əməkdaşlığın və mədəniyyətlərarası dialoqun əhəmiyyətini vurğulayıblar.
İSİM-in İctimai sağlamlıq şöbəsinin müdiri Tofiq Musayev və baş hüquq məsləhətçisi Rüstəm Məmmədov çıxış edərək, sağlamlığın qorunması istiqamətində görülən məqsədyönlü tədbirlərdən, elmin müasir tibdəki həlledici rolundan söz açıblar. Tədbirdə “İctimai sağlamlıq: müasir çağırışlar və strateji yanaşmalar” mövzusu ətrafında səmərəli fikir mübadiləsi aparılıb. Festivalın bədii hissəsi “Uni Kids Club” inkişaf və tədris mərkəzi tərəfindən hazırlanan rəngarəng proqramla davam edib. Yeniyetmə və gənclərin ifasında təqdim olunan rəqs, musiqi, bədii gimnastika və kapoeyra kompozisiyası, eləcə də “Fantaziya” skripkaçılar qrupunun çıxışı və maraqlı səhnəciklər rəğbətlə qarşılanıb.
Festival sağlamlığın sənətlə vəhdətini nümayiş etdirən gənc rəssamların sərgisi, fəal iştirakçılara sertifikat və hədiyyələrin təqdim olunması və xatirə fotolarının çəkilməsi ilə yekunlaşıb.