Azərbaycan Respublikası Səhiyyə Nazirliyinin dəstəyi, nazirliyin İctimai Səhiyyə və İslahatlar Mərkəzinin və OMP Akademiyanın birgə təşkilatçılığı, eləcə də beynəlxalq tərəfdaş qurumların iştirakı ilə Bakı şəhərində II Beynəlxalq Beyin və Neyroelm Konqresi keçirilib.

 

Konqresdə Azərbaycanın tanınmış həkim və alimləri ilə yanaşı, Türkiyə, Rusiya, Qazaxıstan, Özbəkistan və digər ölkələrdən dəvət olunmuş aparıcı mütəxəssislər iştirak ediblər. Konqres çərçivəsində neyrodegenerativ xəstəliklər, Alzheimer və digər demensiyalar, psixosomatik pozuntular, neyrogenomika və fərdiləşdirilmiş risk modelləri kimi aktual mövzular müzakirə edilib. Elmi proqram panel sessiyaları və açıq debat formatında təşkil olunub. Qeyd edək ki, Davamlı Peşəkar İnkişaf proqramı çərçivəsində həkimlər üçün rəsmi elmi platforma statusu daşıyan bu tədbir 8 kredit balı ilə akkreditasiya edilib.