29 DEKABR 2024
Asan Xidmətdə sağlam həyat tərzini təbliğ edən maarifləndirici aksiya keçirilib
Səhiyyə Nazirliyi İctimai Səhiyyə və İslahatlar Mərkəzi və İmişli Rayon İcra Hakimiyyətinin birgə əməkdaşlığı ilə İmişli şəhərində Asan Xidmət Mərkəzində əhali üçün maarifləndirici aksiya keçirilib. Aksiyanın məqsədi sağlam həyat tərzinin təbliğ edilməsi, tütünçəkmə və digər zərərli vərdişlərin sağlamlığa mənfi təsirləri barədə əhali arasında məlumatlılığın artırılması olub.
İştirakçılara ictimaisəhiyyə mütəxəssisləri tərəfindən sağlamlığın qorunması ilə bağlı tövsiyələr verilib. Vurğulanıb ki, son vaxtlar dünya ölkələrində qeyri-infeksion, o cümlədən ürək-damar sistemi xəstəliklərindən əziyyət çəkənlərin sayının çoxalması bir sıra amillərlə sıx bağlıdır.
Əsas risk amillərinə isə, tütünçəkmə və digər zərərli vərdişlərə aludəlik, fiziki passivlik, artıq çəki, piylənmə və qeyri-sağlam qidalanma aiddir. Xəstəliklərin əsas risk amillərinin qarşısını almaq üçün iştirakçılara sağlam həyat tərzi seçmək təşviq edilib, bu mövzulara dair maarifləndirici materiallar paylanılıb.