3 OKTYABR 2024
“Uşaqların ətraf mühitlə bağlı sağlamlığı” mövzusunda təlimlər keçirilib
Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən BMT-nin Uşaq Fondunun (UNİCEF) dəstəyi ilə tibb işçiləri üçün “Uşaqların ətraf mühitlə bağlı sağlamlığı” mövzusunda təlimlər təşkil edilib. Təlimlərin əsas məqsədi tibb işçilərinin bilik və bacarıqlarının inkişaf etdirilməsi, o cümlədən iqlim dəyişikliyi, ətraf mühitin çirklənməsi ilə bağlı məlumatlılığın artırılması olub.
Təlimlərdəqlobal iqlim dəyişikliyi barədə, ətraf mühit amillərinin, ev təsərrüfatı və açıq havanın çirklənməsinin uşaqlara və hamilə qadınlarla təsiri ilə bağlı geniş məlumat verilib.
Təlimlərdə ginekoloq, pediatr, mama və tibb bacısı olmaqla, ümumilikdə 124 tibb işçisi iştirak edib. Təlimləri uğurla başa vuran iştirakçılara sertifikatlar təqdim olunub.
Qeyd edək ki, İSİM və BMT-nin Uşaq Fondu (UNİCEF) tərəfindən birgə əməkdaşlıqla, uşaqların ətraf mühitlə bağlı sağlamlığı üzrə tibb işçiləri və əhali arasında məlumatlılığın artırılması istiqamətində müxtəlif tədbirlərin həyata keçirilməsi, faydalı tövsiyələrin verilməsi, maarifləndirici kitabçaların çap olunaraq paylanılması nəzərdə tutulub.