8 İYUL 2021

Körpə və yenidoğulmuşlara göstərilən xidmətlər üzrə təlimlər keçirildi

Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən BMT-nin Uşaq Fondunun (UNICEF) dəstəyi ilə ilkin səhiyyə işçiləri üçün körpə və yenidoğulmuşlara göstərilən xidmətlər üzrə təlimlərkeçirildi.

Samaxı şəhərində ilkin səhiyyə səviyyəsində çalışan pediatr, ailə həkimləri və patronaj tibb bacıları təlimdə iştirak etdilər. Erkən uşaqlıq dövrü, patronaj tibb bacısının yeni rolu, uşaqlarda ikişafın dəstəklənməsi və izlənilməsi, valideynlik etmə və uşaqların inkişafına qayğı, fərqli inkişaf edən uşaqlar (əlilliyi və inkişaf geriliyi olan uşaqlar), uşağa qarşı sevgi – valideynlərlə iş və s. mövzular üzrə iştirakçılara geniş və ətraflı məlumat verildi. Təlimdə həmçinin, uşaqlıq dövrü xəstəlikləri – öskürək və ya çətinləşən nəfəsalma, ishal, qızdırma, pis qidalanma və anemiya, o cümlədən sağlam uşaqlara düzgün qulluq, körpə və erkən yaşlı uşaqların qidalanması kimi məsələlərə geniş yer verildi və iştirakçıların sualları cavablandırıldı.

Təlimin məqsədi ilkin səhiyyə xidmətlərində çalışan tibb işçilərinin bilik və bacarıqlarının təkmilləşdirilməsi idi. İştirakçılar tərəfindən maraqla qarşılanan təlim təcrübəli həkim-mütəxəssislər Nigar Hacıyeva, Sənubər Vəliyeva, Təranə Seyidməmmədova və Rübabə Quliyeva tərəfindən aparıldı.

Təlim Səhiyyə Nazirliyinin Elmi Tibbi Şurası tərəfindən akkreditasiya olunmuş və 51 Davamlı Tibbi Təhsil kredit balı ilə dəyərləndirilmişdi.

PROACT Təlim Proqramı çərçivəsində həyata keçirilən təlimin fəal iştirakçılarına İSİM-in Layihələrin əlaqələndirilməsi şöbəsinin müdiri Səbinə Babazadə və UNICEF-in Azərbaycandakı nümayəndəliyinin Səhiyyə və qidalanma proqramının rəhbəri Töhfə Cəmilovanın iştirakı ilə sertifikatlar təqdim olundu.

Qeyd edək ki, layihə çərçivəsində, həmçinin, İSİM tərəfindən 4 klinik protokol və 3 metodik vəsaitin hazırlanması nəzərdə tutulub.