23 SENTYABR 2019
46 nömrəli tam orta məktəbdə “Narkomaniyaya yox deyək!” mövzusunda maarifləndirici tədbir keçirildi
20 sentyabr 2019-cu il tarixdə Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM), Nəsimi rayon İcra Hakimiyyəti və Nəsimi Rayon Polis İdarəsinin birgə təşkilatçılığı ilə Ağabəy Novruzbəyli adına 46 nömrəli tam orta məktəbdə “Narkomaniyaya yox deyək!” mövzusunda maarifləndirici tədbir keçirildi.
Məktəbin direktoru Sevinc Budaqova zərərli vərdişlərlə mübarizədə maarifləndirici görüşlərin əhəmiyyətini vurğulayaraq, yeniyetmələri sağlam həyat tərzi keçirməyə, ətraf aləmin gözəlliklərindən – təbiətdən, kitablardan, maraqlı insanlarla ünsiyyətdən zövq almağa, faydalı bilik və bacarıqlar öyrənməyə çağırdı. İSİM-in Layihələrin əlaqələndirilməsi şöbəsinin müdir müavini Ülkər Camalova “Narkomaniya yox deyək!” mövzusunda geniş təqdimatla çıxış edərək, iştirakçıları zərərli vərdişlərin insan orqanizminə göstərdiyi mənfi təsirlər, gələcəkdə sağlamlığa törədəcəyi ağır fəsadlar barədə məlumatlandırdı. Ü. Camalova narkomaniyaya qarşı mübarizə sahəsində İSİM tərəfindən keçirilən maarifləndirici tədbirlər və görülən işlər barədə danışaraq, yeniyetmələrə müvafiq tövsiyələrini çatdırdı.
Nəsimi rayon İcra Hakimiyyətinin, Nəsimi Rayon Polis İdarəsinin məsul şəxsləri respublikamızda narkomaniyaya qarşı mübarizə sahəsində görülən işlərdən söz açdılar, yeniyetmələri, gəncləri zərərli vərdişlərdən uzaq olmağa çağırdılar.
Tədbirdə həmçinin “Narkomaniya-bəşəriyyətin bəlası” adlı videoçarx nümayiş olundu, şagirdləri maraqlandıran suallar cavablandırıldı, şagirdlərin rəsm işlərindən ibarət sərgi nümayiş olundu.
Tədbirin yekununda iştirakçıları maraqlandıran suallar cavablandırıldı və onlara İSİM tərəfindən hazırlanmış maarifləndirici materiallar təqdim edildi.
Şəkillərlə burada tanış olmaq olar.