19 APREL 2019
Özbəkistanda “Sağlamlıq naminə birlik” Şərqi Avropa Diabet Assosiasiyasının rəhbərlərinin XVII sammiti keçirildi
19-21 aprel 2019-cu il tarixdə Özbəkistan Respublikasının paytaxtı Daşkənd şəhərində “Sağlamlıq naminə birlik” Şərqi Avropa Diabet Assosiasiyasının rəhbərlərinin XVII sammiti keçirildi.
Sammitdə Şərqi Avropa Diabet Assosiasiyasına daxil olan 10 ölkənin – Gürcüstan, Qırğızıstan, Rusiya Federasiyası, Ukrayna, Ermənistan, Moldova, Qazaxıstan, Türkmənistan və Belorus Respublikasının nümayəndələri, Beynəlxalq Diabet Federasiyasının rəhbəri Nam Ço və Azərbaycandan Səhiyyə Nazirliyinin İctimai Səhiyyə və İslahatlar Mərkəzinin Layihələrin əlaqələndirilməsi şöbəsinin müdiri Səbinə Babazadə, Azərbaycan Diabet Liqasının rəhbəri Yeganə Sultanova iştrak etdilər.
Şəkərli diabet xəstəliyinin dünyada qlobal səviyyədə sosial və iqtisadi problemlərə səbəb olduğunu nəzərə alaraq, şəkərli diabet xəstəliyinin profilaktikası, müalicəsi, belə xəstələrin həyat qabiliyyətinin yaxşılaşdırılması istiqamətində hazırlanan proqramlarda üzv ölkələrin daim yaxından iştrakını təmin etmək sammitin əsas məqsədi idi. Üç gün davam edən sammit çərçivəsində Özbəkistan Respublikasında diabet xəstəliyinin problemləri və onların həlli yolları, sosial-iqtisadi aspektlər, xəstələrin hüquqlarının qorunması, diabet epidemiyasının qarşısının alınması, proflaktikası, erkən diaqnostikanın vacibliyi və ağırlaşmaların aradan qaldırılması, damar patologiyası, prediabet, yeni texnologiyalardan istifadə, 2-ci tip şəkərli diabetin idarə edilməsi və müasir standartlar geniş müzakirə edildi, şəkərli diabetin müalicəsi və profilaktikası üzrə 2016-2020-ci illər üçün hazırlanan beynəlxalq proqramın aktual məlumatlarının monitorinqi aparıldı. Sammit iştrakçıları ölkələrində şəkərli diabetin müalicəsi və profilaktikası istiqamətində bu günə qədər görülən işlərdən, əldə olunan nailiyyətlərdən və təcrübələrdən söz açdılar. Sankt-Peterburqdan gələn nümayəndələr ölkələrində müvəqqəti qeydiyyatda olan diabet xəstələrini dərman preparatları ilə təmin etməklə bağlı problemlərin aradan qaldırması yollarını izah etdilər.
Sonda ümumi mövzular üzrə iştrakçılar arasında müzakirələr aparıldı, suallar cavablandırıldı.