“Karantin vəziyyətində sağlamlıq imkanları məhdud uşaqların psixoloji reabilitasiyası” mövzusunda onlayn müzakirə təşkil olundu | İСTİMAİ SƏHİYYƏ və İSLAHATLAR MƏRKƏZİ

NEWS all news

30 APRIL 2020

“Karantin vəziyyətində sağlamlıq imkanları məhdud uşaqların psixoloji reabilitasiyası” mövzusunda onlayn müzakirə təşkil olundu

Sağlamlıq imkanları məhdud uşaqlar üçün ailədə, ev mühitində qayğının təmin edilməsi hazırki karantin dövründə xüsusi əhəmiyyət kəsb edir. Bu kateqoriyadan olan uşaqlar üçün interaktiv inkişaf dərsləri və ünsiyyətqurma bacarıqları üzrə tövsiyələrin əhəmiyyətini nəzərə alaraq, Ailə, Qadın və Uşaq Problemləri üzrə Dövlət Komitəsinin feysbuk səhifəsində  29 aprel 2020-ci il tarixdə valideynlər üçün "Karantin vəziyyətində sağlamlıq imkanları məhdud uşaqların psixoloji reabilitasiyası" mövzusunda onlayn müzakirə keçirildi.

Müzakirədə iştirak edən Səhiyyə Nazirliyinin İctimai Səhiyyə və İslahatlar Mərkəzinin şöbə müdiri Səbinə Babazadə və psixoloqu Aysel Musayeva karantin şəraitində valideynlərin uşaqlara daha həssas yanaşmasının vacibliyini vurğuladılar. Valideynlərə daha səbirli olmaq, uşaqlarla danışarkən səs tonuna diqqət yetirmək, yüksək səs tonundan çəkinmək tövsiyə olundu.

Ailə, Qadın və Uşaq Problemləri üzrə Dövlət Komitəsinin şöbə müdiri Cəmilə Bağırova və Daun Sindromlu Şəxslərin Reabilitasiya Mərkəzinin psixoloqu Günay Bədəlzadə valideynləri təmkinli olmağa dəvət etdilər, çünki valideynin karantin şəraitinə gərək olduğundan daha artıq aqressiv reaksiya verməsi uşaqlara da təsir göstərir.

Mütəxəssislər valideynlərin suallarını cavablandıraraq bildirdilər ki, ailədə sağlam psixoloji mühitin yaradılması, qorxu və təşvişin minimuma endirilməsi, karantin rejimi qaydalarına ciddi riayət olunması koronavirusdan qorunmaq üçün ən vacib tövsiyələrdir.